KABUDAYAAN Sunda
ngagaduhan ciri khas nu ngabedakeunna ti kabudayaan-kabudayaan sanes, Sob. Sacara umum masarakat Jawa Barat
atanapi Tatar Sunda, dipikawanoh minangka balarea anu someah, religius, sarta spiritual pisan.
Kacenderungan ieu kasampak sakumaha dina pameo silih asih (ngutamakeun sipat
welas asih), silih asah (liwat atikan sarta babagi elmu), sarta silih asuh (silih
ngajagi kasalametan). Sajaba ti eta Sunda oge ngagaduhan sajumlah nilai sanes
sepertos kasopanan, darehdeh ka sasama, ajen ka anu langkung sepuh, sarta mikanyaah
ka nu langkung alit.
Tapi gening benten kaayaanna di zaman kiwari mah Sob, teu saalit oge urang Sunda ngalakukeun
hal anu matak bisa ngaleungitkeun nilai-nilai kasundaan. Nu kumaha nilai-nilai
kasundaan teh? Enya nu kieu masarakat Sunda umumna dipikawanoh ngajunjung luhur
tatakrama, someah, sarta ngajenan pisan sepuh. Kumaha tah Sobeks nanggapan hal ieu sarta cara pikeun urang tetep ngajagi
nilai-nilai budaya Sunda?
Komentar
kahiji datang ti Muhammad Abdul Muzib, murid kelas X Usaha Perjalan Wisata
(UPW) SMKN 1 Pacet. Anjeunna ngungkabkeun yen nilai kasundaan kedah diterapkeun
dina kahirupan sapopoe. “Urang aya di tatar Sunda, jadi urang kedah nerapkeun
nilai kasundaan. Lamun henteu diterapkeun ku diri pribadi meureun nilai-nilai
kasundaan teh leungit,” ucapna.
Pameget
nu dalit disebat Muzib ieu nambihan salah sahiji nilai Sunda anu kedah diterapkeun
nyaeta aya dina conto kagiatan sapopoe. “Salah sahiji contona urang lamun bade nganjang
ka bumi rerencangan, urang kedah ngetok heula pantona sareung ngucapkeun salam
tilu kali. Lamun tos tilu kali teu aya waleran, urang tong ngetok deui sabab
henteu sopan,” pokna.
Komentar
kadua datang ti Nuryaman, murid kelas X Madrasah Aliyah (MA) Nurul Bayan,
Cikalongkulon. Anjeunna negeskeun yen nilai-nilai budaya Sunda wajib diterapkeun
ku urang Sunda. “Lamun urang ngaku urang Sunda, urang kedah nerapkeun nilai
kasundaan dina kahirupan ieu, sabab eta teh nyirikeun jati diri urang Sunda,”
tegesna.
Rumaja
anu aktif di ekstrakurikuler Pramuka ieu nambihan babaraha conto anu kedah di
biasakeun. “Lamun urang ngalangkung kapayuneun batur, urang kedah nyebatkeun
punten sabab lamun henteu urang teu ngahargaan ka batur anu keur aya di dinya,”
jelasna.
Benteun
halna sareng Safitri Nurhalimah, anjeunna nerangkeun yen budaya Sunda nempatan hal
nu penting pisan dina kahirupan. “Sumanget sarta
ruh kasundaan kedah ditanemkeun sarta disebarluaskeun ka balarea margi nilai-nilai
ngandung kasundaan anu positip,” paparna.
Safitri
nu ayeuna kelas X Administrasi Perkantoran 2 SMKN 1 Cipanas ieu nambihan naon
wae nilai-nilai Sunda anu kedah ku urang terapkeun. “Salah sahiji anu kedah diterapkeun
nyaeta tina cara nyarios. Upami nyarios ka nu lewih sepuh nyaurana kedah
ngangge panggero akang upami ka pameget, sareung teteh upami ka istri,”
pungkesna.(hadad/smaalazharycianjur)
Tidak ada komentar:
Posting Komentar